भारतीयलाई नागरिकता दिन साक्षी बस्ने मेयरसहित २१ जनालाई जरिवाना

काठमाडौं - जिल्ला अदालत रौतहटले भारतीय नागरिकलाई जन्मसिद्धको आधारमा नेपाली नागरिकता दिलाउन सहयोग गरेको अभियोगमा कटहरिया नगरपालिकाहका मेयरसहित २१ जनालाई जरिवानाको फैसला सुनाएको छ।

मेयर सियारामप्रसाद कुशवाहसहित भारतीयलाई नेपाली नागरिकता दिलाउन सहयोग गर्ने २१ जनाविरुद्ध अदालतले जनही २५ हजार रुपैयाँ जरिवानाको फैसला सुनाएको हो। जिल्ला न्यायाधीश उमानाथ गौतमको इजलासले भारतको विहार राज्य पूर्वी चम्पारण जिल्ला घर भई रौतहट हथियाही बस्ने हाफिज देवान र ओली महमद देवान फकीरलाई झुटो विवरणको आधारमा नागरिकता दिलाएको अभियोगमा जरिवानाको फैसला सुनाएको अदालतले जानकारी दिएको छ।

अदालतले झुटो विवरणको आधारमा नागरिकता लिने दुबैको नागरिकता बदर गरी जनही ५० हजार रुपैयाँ जरिवानाको फैसला सुनाएको अदालतका श्रेस्तेदार गुणराज पराजुलीले जानकारी दिए।

भारतीयलाई नागरिकता दिन सहयोग गरेको भनी सन्त बहादुर श्रेष्ठले उनीहरुविरुद्ध २०७२ साल भदौ २९ गते मुद्दा दायर गरेका थिए।