काठमाडौं- घुससहित पक्राउ परेका नेपाल प्रहरीका नायव निरीक्षक र नक्कली शैक्षिक प्रमाण पत्रलबाट जागिर खाने शिक्षकसहित तीन जनाविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ।
प्रहरी चौकी त्रिभुवननगर, सर्लाहीमा कार्यरत सई राजेशकुमार सिंह, प्रहरी जवान मनोजकुमार यादव र सिन्धुलीको सुनडाँडा प्राथमिक विद्यालय भद्रकालीमा कार्यरत शिक्षक ज्ञानु रायमाझीविरुद्ध अख्तियारले बिहीबार मुद्दा दायर गरेको हो।
सई र प्रहरी जवान भारतीय सीमा नाकाबाट नेपालतर्फ घरायसी सामान भित्र्याउने काममा सहज गराई दिने भन्दै सेवाग्राहीबाट लिएको ५० हजार घुससहित पक्राउ परेका थिए।
उनीहरुले सामान ओसारपसार गरेबापत मागेजति रकम नदिएमा लागूऔषध मुद्दा चलाउने भनी धाकधम्की र कुटपिटसमेत गरेको अनुसन्धानका क्रममा खुलेको अख्तिारले जनाएको छ।
यस्तै शिक्षक रायमाझीले विहार विद्यालय परीक्षा समिति पटनाबाट जारी गरिएको हाइस्कुल तहको झुठ्ठा नक्कली शैक्षिक योग्यताको प्रमाणपत्र पेश गरी २०५४/०५/१४ मा प्राथमिक शिक्षक (तृतीय) श्रेणीमा अस्थायी नियुक्ति लिएको खुलेको अख्तियारले जनाएको छ।
यस्तै उनले २०६३/०४/३० मा प्राथमिक शिक्षक (तृतीय) श्रेणीमा स्थायी नियुक्ति भई सरकारी लाभ सुविधा लिएको पुष्टि भएको भन्दै अख्तियारले मुद्दा दायर गरेको अयोगका प्रवक्ता प्रदीपकुमार कोइरालाले जानकारी दिए।