सुर्खेत - सल्यानमा बन्दुकसहित एक जना पक्राउ परेका छन्। जिल्ला प्रहरी कार्यालय सल्यानले बन्दुकसहित शारदा नगरपालिका १३ स्यानीखालका ४४ वर्षीय देवबहादुर बुढामगरलाई पक्राउ गरेको हो।
मानसिक सन्तुलन गुमेका उनले परिवारका सदस्यलाई नै मार्न खोजेपछि नियन्त्रणमा लिएको सल्यानका डिएसपी ढकेन्द्र खतिवडाले जानकारी दिए। परिवारका अनुसार बुढाको दशदेखि मानसिक सन्तुलन गुमेको छ। ‘दश वर्षदेखि मानसिक सन्तुलन गुमेको छ’, डीएसपी खतिवडाले भने ‘केही समय सुधार केन्द्रमा राखिएको रहेछ पछि घर ल्याइएको रहेछ।’
मानसिक उपचारपछि घर आएका बुढाले फेरि मानसिक सन्तुलन गुमाएको प्रहरीको भनाई छ। मानसिक सन्तुलन गुमेपछि उनी परिवारका सदस्यमाथि नै जाइलाग्न थालेका थिए। पक्राउ परेका बुढाले आफूसँग अन्य बन्दुक पनि रहेको बताएको प्रहरीले जनाएको छ। पक्राउ परेका बुढालाई प्रहरीले सल्यान अस्पतालमा उपचारका लागि भर्ना गरेको छ।