साढे चार किलो गाँजासहित पक्राउ

काठमाडौं । पर्सा प्रहरीले साढे चार किलोग्राम लागुऔषध गाँजासहित एक भारतीयलाई पक्राउ गरेको छ। पक्राउ पर्नेमा भारत चम्पारण मोतिहारीका ५० वर्षीय राजेश महतो छन्।

शरिरमा बेरेको पटुका भित्र लुकाई छिपाई भारतर्फ ओसार्दै गरेको अवस्थामा उनलाई पक्राउ गरी अनुसन्धान भैरहेको पर्सा प्रहरीले जनाएको छ। उनलाई वीरगन्ज महानगरपालिका–१६ रजतजयन्ती चौकमा प्रहरी चौकी इनरुवाबाट खटिएको प्रहरी टोलीले चेकजाँच गर्ने क्रममा पक्राउ गरेको प्रहरीले जनाएको छ।

यस्तै प्रहरीले लागुऔषध गाँजा मुद्दामा १५ बर्ष देखि फरार जगरनाथपुर गाउँपालिका–३ का राजेश्वर प्रसाद यादवलाई पक्राउ गरेको छ। यादवलाई पर्सा जिल्ला अदालतले २०६१ पुस ३ गते चार बर्ष १० महिना २२ दिन कैद र २५ हजार जरिवानाको सजाय सुनाएएको थियो। उनलाई गाँउघरमा लुकी छिपी बसिरहेको अवस्थाबाट पक्राउ गरी जिल्ला अदालत बुझाएको प्रहरीले जनाएको छ।

यस्तै पर्सा प्रहरीले सवारी ज्यान मुद्दामा एक बर्ष सात महिना दुई दिन कैद र दुई हजार जरिवानाको सजाय सुनाईएका जयमंगलापुरका मिथुन चक्रवति राउत कुर्मीलाई पक्राउ गरी जिल्ला अदालतमा बुझाएको छ। जिल्ला अदालतले गत मंसिर २ गते उक्त फैसला सुनाएको थियो।