जावलाखेलको सहज जित

काठमाडौं - शहीद स्मारक ‘ए’ डिभिजन लिग फुटबल प्रतियोगिताअन्तर्गत मंगलबार भएको पहिलो खेलमा जावलाखेल युथ क्लबले च्यासल युथ क्लबलाई पराजित गरेको छ। सातदोबाटोस्थित एन्फा कम्प्लेक्समा भएको खेलमा जावलाखेलले च्यासललाई २-० गोल अन्तरले पराजित गरेको हो। जीतसँगै जावलाखेल लिगको तेस्रो स्थानमा उक्लिएको छ। जावलाखेलले चार खेलमा ८ अंक जोडेको छ।

जावलाखेलको जीतमा रुपबहादुर लामा र विजय घलानले एक/एक गोल गरे। दुवै गोल खेलको दोस्रो हाफमा भएको थियो।

खेलको ८० औं मिनेटमा रुपबहादुरले गोल गर्दै जावलाखेललाई अग्रता दिलाए। त्यसको दुई मिनेटपछि विजय घलानले अर्को गोल गर्दै जावलाखेललाई २-० को जीत दिलाए। पराजित च्यासल चार खेलमा ४ अंक जोड्दै अंक तालिकाको आठौं स्थानमा छ।