कांग्रेस महाधिवेशन रोक्न माग गरिएको रिटको पेशी आइतबार

काठमाडौं– नेपाली कांग्रेसको आशन्न महाधिवेशन रोक्न माग गर्दै सर्वोच्च अदालतमा दायर भएको रिटको पेशी आइतबारलाई तोकिएको छ। बागमती प्रदेशसभा सदस्य नरोत्तम वैद्यले दाय गरेको रिट निवेदन दर्ता भएर पेसी तोकिएको सर्वोच्च अदालतले जनाएको छ।

कोरोना संक्रमणका कारण महाधिवेशन गर्न नहुने र कानुनी रूपमा कांग्रेसको वैधता २०७९ साल जेठ ३० गतेसम्म कायम रहने तर्कसहित वैद्य सर्वोच्च अदालत पुगेका हुन्। कांग्रेसको महाधिवेशनले कोरोना नफैलाओस्, कोरोना व्यवस्थापन भइसकेपछि सबै नेपालीले भ्याक्सिन लगाइसकेपछि अनि भव्यताका साथ नेपाली कांग्रेसको महाधिवेशन गरौं भनेर सर्वोच्चमा रिट हालेको वैद्यले बताए। 

एमाले र माओवादीको महाधिवेशन नभएको पनि धेरै समय भएकाले कांग्रेसमात्रै अवैध हुन्छ भन्न नमिल्ने तर्क उनले रिट निवेदनमा गरेका छन्। कांग्रेसको वर्तमान कार्यसमिति ०७३ मंसिर ३० गतेदेखि गणना हुने वैद्यको जिकिर छ। ५ वर्ष नाघेको कुरा व्यवहारिक भएको उनको भनाइ छ।