काठमाडौं– कस्तुरीको बिनाजस्तो देखिने वस्तुसहित काठमाडौंको चावहिल गणेशस्थानबाट प्रहरीले एक युवकलाई पक्राउ गरेको छ।
प्रहरीका अनुसार पक्राउ पर्नेमा सुनसरीको रामधुनी–७ का ३८ वर्षीय श्याम भट्टराई हुन्। भट्टराईको साथबाट ६ वटा डल्ला बनाइ प्याक गरिएको कस्तुरीको बिनाजस्तो देखिने वस्तु बरामद भएको गौशाला वृत्तका डिएसपी प्रडीपकुमार सिंहले जानकारी दिए।
बाटोमा हिँड्दै गरेको अवस्थामा भट्टराईलाई आइतबार बेलुकी पक्राउ गरिएको सिंहले जानकारी दिए। उनलाई थप अनुसन्धानका लागि डिभिजन वन कार्यालयको जिम्मा लगाउने तयारी भएको प्रहरीले जनाएको छ।