भैरहवा– भैरहवामा रहेको होटल पौवाले खानापछिको परिकार डिजर्टमा ‘सुजता खीर’लाई ब्रान्डको रुपमा विकास गर्ने भएको छ । होटल पौवा प्रालिका प्रबन्ध निर्देशक विष्णु प्रसाद ज्ञवालीले पौवा होटलको डिजर्टमा अंग्रेजी नयाँ वर्षको शुरुवातसँगै सुजता खीर राख्न थालिएको बताए ।
सुजता खीरलाई प्रदेश ५ सरकारले नै आफ्नो ब्रान्ड खानाको रुपमा विकास गर्ने अभियान शुरु गरेको छ । प्रदेश सरकारको अभियानलाई साथ दिँदै पौवा ग्रुपले यस्तो गरेको ज्ञवालीले बताए । बुद्धले ध्यान गर्दा धेरै दिन निराहार बस्दा शरीर कमजोर भएको अवस्थामा एक जना सुजता नामक युवतीले खीर खान दिएको र उक्त खीर खाएकै दिन उनले बुद्धत्व प्राप्त गरेको बुद्ध जातकमा उल्लेख छ । यसैले सुजता खीरलाई बुद्धको जन्मस्थल लुम्बिनी क्षेत्रमा ब्रान्डको रुपमा विकास गर्ने प्रदेश सरकारको भनाइ छ ।
पौवा समूहका देशैभरका होटलमा विदेशी पर्यटकलाई १० प्रतिशत नेपाल भ्रमण बर्ष २०२० अवधिभर छुट दिने प्रबन्ध निर्देशक ज्ञवालीले बताए । भ्रमण वर्ष अवधिभर २० प्रकारका रैथाने खानाका परिकार खुवाउने तयारी पनि गरेको होटलका प्रबन्धक विष्णु भण्डारीले बताए ।
१० वर्षमा देशभरमा १०० वटा शाखासहितको योजना लिएर अगाडि बढेको पौवा ग्रुप नेपालमा छोटो समयमा होटल व्यवस्थापनमा सफल देखिएको छ । उक्त समूहको रुपन्देहीको भैरहवा र बुटवल, दाङको भालुवाङ, कपिलवस्तुको गोरुसिङे, कर्णालीको जुम्लामामा होटल सञ्चालनमा छन् ।
पाल्पाको तानसेन, गुल्मीको रेसुंगामा होटल निर्माण प्रक्रियामा रहेको छ भने चालू आर्थिक वर्षमा अत्तरीयामा पनि सेवा सुरु गर्ने लक्ष्य समूहले लिएको छ । कर्णालीको चिसापानी, पोखरा, काठमाडौ, जनकपुर र बर्दिवासमा पनि पौवा समूहले होटल खोल्ने तयारी गरेको छ ।