काठमाडौं– पोखरा प्रिमियर लिग (पीपीएल)को फाइनलमा चितवन राइनोजले विराटनगर टाइटन्ससामु २०३ रनको विशाल लक्ष्य प्रस्तुत गरेको छ।
टस हारेर ब्याटिङ थालेको चितवनले निर्धारित २० ओभरमा ५ विकेट गुमाएर २०२ रनको योगफल तयार पार्यो।
चितवनकाे विशाल स्काेर बनाउन अनिलकुमार साह र रोहन मुस्तफाले ५०–५० रन जोडे। ३४ बल खेलेका साहले आफ्नो पारीमा ३ चौका र ३ छक्का प्रहार गरे। यस्तै, मुस्तफाले ४३ बलमा ३ चौका र १ छक्का हिर्काए।
कप्तान पारस खड्काले आक्रामक पारी खेल्दै ११ रनमा ४ चौका र १ छक्का प्रहार गरी २५ रनको योगदान दिए। आरिफ शेखले ११ बलमा १९ रन जोडे। करन केसी २६ र सन्नी पटेल १६ रनमा अविजित रहे। ८ बल खेलेका केसीले आफ्नो पारीमा दुई चौका र दुई छक्का प्रहार गरे भने समान बल खेलेका पटेलले दुई चौका हिर्काए।
अघिल्ला खेलमा उत्कृष्ट प्रदर्शन गरेका बाबर हायात भने ५ रनमा आउट भए।
बलिङतर्फ विराटनगरका पुनित मेहरा र मोहम्मद जैद आलमले समान २ विकेट लिँदा किशोर महतोले १ विकेट चट्काए।
विराटनगरले केही बेरमा जवाफी ब्याटिङ थाल्नेछ।
चितवन समूह चरणमा शीर्ष स्थानमा रहँदै फाइनल पुग्दा विराटनगरले बुटवललाई इलिमिनेटरमा हराउँदै अन्तिम दुईमा स्थान बनाएको हो।