काठमाडौं - राष्ट्रिय प्रजातन्त्र पार्टीका अध्यक्ष कमल थापाले नेताहरुमा राणाकालिन आत्मसमर्पणवादी मानसिकता बढेर गएको आरोप लगाएका छन्। शनिबार सामाजिक सञ्जालमार्फत आफ्नो विचार राख्दै थापाले भारतीय राजदूत बिदाईको सन्दर्भमा राष्ट्रपतिदेखि ठूला दलका नेताले देखाएको व्यवहारले गणतन्त्र आएपनि नेताहरुमा राणाकालिन आत्मसमर्पणवादी मानसिकता भने झनै बढेर गएको आरोप लगाए।
थापाले भने, 'राजदुतहरु आउने जाने क्रम चलिरहन्छ। त्यो स्वभाविक हो। तर,अहिले भारतीय राजदूतको बिदाईको सन्दर्भमा राष्ट्रपतिदेखि विभिन्न दलका नेताहरुको अस्वभाविक व्यवहार देख्दा लज्जावोध हुन्छ। देशमा ठूलो परिवर्तन भयो, गणतन्त्र आयो भनिन्छ तर नेताहरुको राणाकालिन आत्मसमर्पणवादी मानसिकता भने झन् बढेर गयो।'
सन् २०१७ को २६ मार्चदेखि भारतीय राजदूतका रुपमा नेपाल आएका मञ्जिभसिंह पुरी आफ्नो कार्यकाल पूरा गरी २ जनवरीमा स्वदेश फर्कदै छन्। यसक्रममा पुरीले राष्ट्रपति विद्यादेवी भण्डारी, प्रधानमन्त्री केपी शर्मा ओली, नेपाली कांग्रेसका सभापति शेरबहादुर देउवा तथा नेकपाका वरिष्ठ नेता माधवकुमार नेपालसँग भेटवार्ता गरेका थिए।