काठमाडौं- बाक्सो हुस्सुसँगै काठमाडौं उपत्यकामा अत्यधिक चिसो बढेको छ ।
बुधबारको तुलानामा बिहीबार न्यूनतम तापक्रम स्वाट्टै घटेको छ । मौसम पूर्वानुमान महाशाखाका अनुसार आज (बिहीबार) यो वर्षकै सबैभन्दा कम न्यूनतम तापक्रम मापन गरिएको छ ।
आज बिहान ८ः ४५ बजे गरिएको मापनमा काठमाडौंको तापक्रम शून्य दशमलब ९ डिग्री सेल्सियसमा झरेको महाशाखाले जनाएको छ ।
यसअघि आजै बिहान ६ः३० बजेको तापक्रम भने १ डिग्री सेल्सीयस थियो । बुधबारको न्यूनतम तापक्रम २.९ डिग्रीसेल्सियस थियो ।
न्यूनतम तापक्रम घटेसँगै अत्याधिक चिसो महशुस गरिएको छ । मौसम पूर्वानुमान महाशाखाका अनुसार काठमडौं उपत्यकासहित देशभर अझै चिसो बढ्ने छ ।
भोलिको तापक्रम शून्य डिग्रीमा झर्न सक्ने अनुमान गरिएको छ । महाशाखाका अनुसार काठमाडाैंकाे तापक्रम माइनसमा जाने सम्भावना देखिएकाे छ ।
आज तराईका जिल्लाहरुमा पनि बाक्लो हुस्सु लागेको छ । हुस्सुसँगै तराईका जिल्लाहरुमा पनि चिसो बढेको छ भने शीतलहरको समेत जोखिम देखिएको मौसमविद् समिर श्रेष्ठले बताए ।
आज देशका पूर्वी र पश्चिमी पहाडी भू–भागका थोरै स्थानहरुमा आंशिक बदली रही बाँकी भू–भागमा सामान्यतया मौसम सफा रहने मौसम पूर्वानुमान महाशाखाले जनाएको छ ।