जनकपुरधाम– ठूलो परिमाणमा अवैध सुनचाँदीका गहनासहित सिरहाबाट प्रहरीले एकजनालाई पक्राउ गरेको छ । पक्राउ पर्नेमा सिरहाको गोलबजार नगरपालिका–४ बस्ने ३४ वर्षीय मनोज राय रहेको प्रहरीले जनाएको छ ।
प्रहरी चौकी ठाडीबाट खटिएको टोलीले चेकजाँचका क्रममा जिल्लाको भगवानपुर गाउँपालिका–४ ठाडी बजारबाट अवैध सुनचाँदीका गरगहनासहित रायलाई नियन्त्रणम लिएको हो ।
ज २ प ६४२२ नम्बरको मोटरसाइकल चढेर भारतबाट नेपालतर्फ आउँदै गरेको अवस्थामा डिकीभित्र लुकाएर राखिएको सुनचाँदीको गहना बरामद भएको जिल्ला प्रहरी कार्यालय सिरहाका प्रवक्ता डीएसपी अपिलराज बोहराले जानकारी दिएका छन् ।
रायको साथबाट बरामद गरिएको सुनचाँदीको गहनाको मूल्य चार लाख १८ हजार ७०५ रुपैयाँ रहेको प्रहरीले जनाएको छ । पक्राउ परेका रायविरुद्ध थप अनुसन्धान भइरहेको डीएसपी बोहराले बताएका छन् ।