काठमाडौं। गुन्डा नाइके रमेश बाहुन समूहका सुटर दुर्गा राईलाई प्रहरीले पक्राउ गरेको छ। राईलाई महानगरीय अपराध अनुसन्धान महाशाखा, टेकुको टोलीले कोटेश्वर क्षेत्रबाट पक्राउ गरेको महाशाखा प्रमुख प्रहरी वरिष्ठ उपरीक्षक सहकुलबहादुर थापाले जानकारी दिए।
व्यवसायीलाई धाकधम्की दिएर गुण्डागर्दी गरेको लिखित उजुरीका आधारमा राईलाई अनुसन्धानका लागि नियन्त्रणमा लिएकाे थापाले बताए। प्रहरीका अनुसार राईले फोन गरेर तथा भेटेर व्यापारीहरुलाई धाकधम्की दिने गरेको दुई–तीन वटा उजुरी परेको छ। पक्राउ पर्ने राई यसअघि पाँच वर्ष जेल सजाय भागेर छुटेका बुझिएको छ।
थापाका अनुसार प्रहरीको ‘मोस्ट वान्टेड’ गुण्डा नाइके दावा लामा समूहका विष्णु धिताल पनि पक्राउ परेका छन्। उनले पनि विभिन्न व्यक्तिलाई धाकधम्की दिएर रकम असुल्ने गरेको उजुरी महाशाखामा परेको छ।