काठमाडौं- दैलेखको ठाँटीकाध गाउँपालिकाका अध्यक्ष धीरबहादुर शाहीलाई अज्ञात समूहले अपहरण गरेको छ ।
उनीसँगै उनकी पत्नी लिला शाहीलाई पनि अज्ञात समूहले शनिबार मध्यराति अपहरण गरेको प्रहरीले जनाएको छ।
हतियारसहित आएका १५/१६ जनाको समूहले सोधपुछ गर्न भन्दै नियन्त्रणमा लिएको जिल्ला प्रहरी कार्यालय दैलेखले जनाएको छ ।
प्रहरीले अपहरण विप्लव समूहले गरेको हुनसक्ने आशंका गरेको छ । उनीहरुको खोजी कार्य तीव्र पारिएको प्रहरीले जनाएको छ ।
प्रमुख जिल्ला अधिकारी युवराज कट्टेलले भने अहिलेलेसम्म कसले किन अपहरण गरेको हो भन्ने विषयमा केहि नखोलेको जानकारी दिए । उनले कहि कतै कुनै पर्चा नभेटिएको पनि बताए ।
शाही दम्पतीलाई दैलेख कालीकोटको सीमानातर्फ लगेको स्थानीयले बताएका छन् ।