पौडेल-सिटौला समूहको बैठक जारी, महाधिवेशनको तालिका सार्वजनिक गर्न देउवा तयार

काठमाडौं– नेपाली कांग्रेसको केन्द्रीय समिति बैठक बहिस्कार गर्दै आएको वरिष्ठ नेता रामचन्द्र पौडेल र कृष्णप्रसाद सिटौला समूहको बैठक पौडेल निवास बोहोराटारमा बसिरहेको छ। आज दिउँसो १ बजेका लागि बोलाइएको केन्द्रीय समिति बैठकमा सहभागी हुने अथवा बहिस्कार जारी राख्ने निर्णय लिन नेता पौडेलको निवासमा बिहानदेखि बैठक जारी छ।

कांग्रेसको १४ औं महाधिवेशनको कार्यतालिका सार्वजनिक गर्न सभापति शेरबहादुर देउवा पक्षधर तयार भएकोले बैठकबाट सकारात्मक निर्णय आउन सक्ने पौडेल निकट एक केन्द्रीय सदस्यले बताए।

बैठकमा सहभागी ती केन्द्रीय सदस्यका अनुसार देउवाले केही दिनभित्रै महाधिवेशनको कार्यतालिका सार्वजनिक गर्ने सन्देश उपसभापति विमलेन्द्र निधिमार्फत् पठाएका थिए। नेता सिटौलासँगको छलफलमा पनि उक्त विषय समेट्ने प्रतिबद्धता देउवाले व्यक्त गरेपछि सिटौला पनि पौडेलको बैठकमा सहभागी छन्।

यसैगरी, विभागमा पनि भागवण्डाको विषयलाई आधार मान्ने पक्षमा देउवा पुगेका छन्। तर, कृष्ण सिटौला र विजय गच्छदार पक्षलाई कसरी व्यवस्थापन गर्ने भन्ने विषयमा निष्कर्ष आएको छैन।