नेकपा स्थायी कमिटी बैठक : १२ जनाले बोले, भोलि फेरि बस्ने

काठमाडौं- सत्तारुढ नेपाल कम्युनिष्ट पार्टी नेकपाको स्थायी कमिटी सदस्यहरुले राजनीतिक प्रतिवेदनमाथि आफ्नो धारणा राखेका छन्।

सोमबार पार्टी केन्द्रीय कार्यालय धुम्बाराहीमा बसेको स्थायी कमिटी बैठकमा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डले पेश गरेको राजनीतिक प्रस्तावमा स्थायी कमिटीका १२ जना सदस्यहरुले आफ्नो धारणा राखेका हुन्।

बैठकमा बोल्ने नेताहरुले महासचिव विष्णु पौडेलको विधान संशोधन प्रस्तावमाथि पनि आफ्नो विचार राखेका छन्।

२० मिनेटमा नेताहरुले दुबै प्रतिवेदनमा आफ्नो धारणा राख्ने समय तोकिएको थियो।

तोकिएको समयमा नेताहरुले पार्टी संगठन सुदृढिकरण तथा सरकारको कामलाई प्रभावकारी बनाउने विषयमा बोलेका थिए।

सोमबार बैठकमा वामदेव गौतम, अष्टलक्ष्मी शाक्य, भीम रावल, योगेश भट्टराई, पम्फा भुसाल, देवेन्द्र पौडेल, गणेश साह, छविलाल विश्वकर्मा, मुकुन्द न्यौपाने, अग्नि सापकोटा, युवराज ज्ञवाली र देव गुरुङले बोलेका थिए।

आइतबारको बैठकमा अध्यक्ष प्रचण्डले राजनीतिक प्रस्ताव र महासचिव विष्णु पौडेलले विधान संशोधन सम्बन्धी प्रस्ताव पेश गरेका थिए।

नेकपा स्थायी कमिटीको अर्को बैठक मंगलबार बिहान ११ बजेका लागि बोलाइएको छ।