काठमाडौं– आगामी माघ ९ गते हुने राष्ट्रियसभा निर्वाचनका लागि आजदेखि निर्वाचन आयोगमा दल दर्ता सुरु हुँदैछ।
निर्वाचन आयोगले दर्ता भएका दललाई मंसिर २७ देखि पुस ६ गतेसम्म निर्वाचनका लागि दल दर्ता गर्न आह्वान गरेको हो।
राष्ट्रियसभामा रिक्त हुने १९ सदस्यका लागि निर्वाचन हुँदैछ।
नेपाल कम्युनिस्ट पार्टी (नेकपा)का आठ, नेपाली कांग्रेसका सात र राष्ट्रिय जनता पार्टीका दुई, समाजवादीका एक र सरकारबाट मनोनित एक जनाको कार्यकाल फागुन २१ मा सकिँदै छ।
अर्थमन्त्री युवराज खतिवडाको पनि कार्यकाल पूरा हुँदैछ। उनी सरकारबाट मनाेनित भएर अर्थमन्त्री भएका हुन्।
“नेपालको संविधानको धारा २६९ तथा राजनीतिक दलसम्बन्धी ऐन २०७३ को दफा ४ बमोजिम निर्वाचन आयोगमा दर्ता कायम रहेका दलहरूलाई राष्ट्रिय सभा सदस्य निर्वाचन प्रयोजनको लागि संविधानको धारा २७१ तथा राजनीतिक दलसम्बन्धी ऐन, २०७३ को दफा ४८ बमोजिम दर्ताको लागि २०७६ मंसिर २७ देखि पुस ६ गतेसम्म कार्यालय समयभित्र आयोगको काठमाडौं, कान्तिपथस्थित, बहादुर भवनमा राजनीतिक दलसम्बन्धी नियमावली, २०७४ को अनुसूची–१२ बमोजिमको ढाँचामा निवेदन दिन आह्वान गरिएको छ,” आयोगद्वारा जारी विज्ञप्तिमा उल्लेख छ।