निर्वाचनका लागि दल दर्ताको आह्वान

काठमाडौं - निर्वाचन आयोगले आगामी माघ ९ गते हुने राष्ट्रियसभा सदस्य निर्वाचनका लागि नेपालको संविधानको धारा २७१ तथा राजनीतिक दलसम्बन्धी ऐन २०७३ को दफा ४८ बमोजिम आयोगमा दर्ता भएका दलहरुलाई यही मङ्सिर २७ देखि पुस ६ गतेसम्ममा राजनीतिक दल दर्ता गराउन सम्बद्ध सबै दललाई आह्वान गरेको छ।

राष्ट्रिय सभाको रिक्त १९ पदका लागि निर्वाचन हुन लागेको हो।

५९ सदस्यीय राष्ट्रियसभाका सदस्यमध्ये १९ जना सदस्यको आगामी फागुन २० गतेदेखि पद रिक्त हुँदैछ। दुई वर्षे कार्यकाल पूरा गर्ने नेपाल कम्युनिष्ट पार्टी (नेकपा) का ९, नेपाली कांग्रेसका ७, राजपाका दुई र समाजवादी पार्टीका एक जना रहेका छन्।

१९ सांसदको कार्यकाल सकिन लागेपछि निर्वाचन आयोगले माघ ९ गते निर्वाचन गर्न सरकारसमक्ष मिति प्रस्ताव गरेको थियो। राष्ट्रियसभा सदस्य निर्वाचन ऐन अनुसार पनि सदस्यको कार्यकाल सकिनुभन्दा ३५ दिनअघि निर्वाचन गर्नुपर्ने व्यवस्था छ।