सोमबार, चैत २४, २०७६

समाचार

प्रधानमन्त्रीको ६९ औं जन्मदिनः बालुवाटारमा केक, जन्मघरमा भोज

1582475114UN_Teharthum_8885.jpg

काठमाडौं– प्रधानमन्त्री केपी शर्मा ओलीले आफ्नो ६९ औं जन्मदिन ‘विशेष’ तरिकाले मनाएका छन्। बिहान बालुवाटारस्थित सरकारी निवासमा उनले बुबा, पत्नी, मन्त्री तथा पार्टीका नेताहरु एवं सचिवालयका सदस्यहरुसँग केट काटे ।

झापा बस्दै आएका ओलीका बुबा मोहनप्रसाद छोराको जन्मदिनका लागि काठमाडौं आएका हुन्।

बालुवाटारपछि ओली आफ्नो जन्मघर तेह्रथुमको आठराई पुगे। प्रधानमन्त्री ओली आफ्नो जन्मघरमा अपराह्न २ बजे पुगेका थिए। उनलाई संघीय सांसद भवानीप्रसाद खापुङ, प्रदेशसभा सदस्य लक्ष्मण तिवारी र तेजमान कङ्दम्वा, गाउँपालिका अध्यक्ष मानबहादुर लिम्बू र स्थानीयवासीले स्वागत गरे।

प्रधानमन्त्रीको स्वागतमा लिम्बू समुदायको च्याब्रुङ नाच, संगिनी नाच र झाँकी प्रदर्शन गरिएको थियो। आठराईका विभिन्‍न चोकमा स्वागतद्वार बनाइएको थियो।

सुकेपोखरी–भदौरै सडकको सिलान्यास र आठराई–१, सङ्कान्ति बजारमा स्थापना गरिएको नेपाल बैंक लिमिटेडको १७७ औँ शाखा उद्घाटन गरेर उनी आफ्नो घरमा पुगेका हुन्।

जन्मदिन मनाउन पहिलोपटक जन्मघर पुगेका ओलीलाई स्वागत गर्न आठराई आतुर थियो। प्रधानमन्त्रीको जन्मदिन उल्लासका साथ मनाउन आठराई गाउँपालिकाले सार्वजनिक बिदा नै घोषणा गरिदियो।

काठमाडौंबाट हेलिकोप्टर लिएर ओली बुबा, पत्नी, अर्थमन्त्री युवराज खतिवडा, स्वास्थ्यमन्त्री भानुभक्त ढकाल, ऊर्जामन्त्री वर्षमान पुन, खानेपानीमन्त्री बीना मगरसहित आठराई पुगे। प्रदेश १ बाट मुख्यमन्त्री शेरधन राई त्यसअघि नै आठराई पुगिसकेका थिए। गाउँमा हेलिकोप्टर अवतरण गर्न केही समयअघि नै हेलिप्याड बनाइएको थियो।

ओलीको जन्मदिन मनाउन ३–४ महिना अघिदेखि नै तयारी सुरु भएको थियो।

ओलीको जन्मघरमा पनि केक काटियो। घरको आँगनमा उनले स्थानीय ज्येष्ठ नागरिक महिलालाई सारी र पच्छ्यौरा बाँडे । पुरुषलाई भादगाउँले टोपी र ज्याकेट बाँडियो। करिब २ हजार विद्यार्थीले प्रधानमन्त्रीको तस्बिर र हस्ताक्षरसहितको डायरी र पेन पाए ।

कार्यक्रमको सुरक्षा व्यवस्थाका लागि प्रहरी र सेना गरी झन्डै २ सय सुरक्षाकर्मी खटेका थिए। त्यति नै संख्यामा स्थानीय युवालाई स्वयंसेवक खटाइएको थियो।

ओलीले आफ्ना बाल्यकालका साथीसहित बसेर केक काटे, साथीभाइसँग एकछिन भेटघाट र कुराकानी गरे। घरवरिपरि अवलाेकन गरे।

जन्मदिनको अवसरमा आयोजित भोजमा ५ हजारलाई खाना खुवाउने तयारी स्थानीय आयोजकको थियो।

ओली जन्मे–हुर्केको घर २०७२ को भूकम्पमा चर्किएपछि मर्मत गरी राम्रो बनाइएको छ। दुईतले घरको माथि सिलिङ छ। छानो खरको छ। ओलीले यो घरकै आँगनमा जोडेर बनाएको अलि ठूलो घर पनि किनेका छन्। दुवै घर र खेतबारीको रेखदेख र संरक्षणका लागि चारजनाको परिवारलाई जिम्मा दिइएको छ।

जन्मदिनकै पूर्वसन्ध्यामा हिजो (शनिबार) ओलीको पुस्तक ‘भिजन टु एक्सन’ सार्वजनिक गरिएको थियो । प्रधानमन्त्री निवास बालुवाटारमा आयोजित कार्यक्रममा राष्ट्रकवि माधवप्रसाद घिमिरे र शताब्दी पुरुष सत्यमोहन जोशीले पुस्तक विमोचन गरेका थिए।

प्रधानमन्त्री ओली छिटै पुनः मिर्गौला प्रत्यारोपण गर्ने तयारीमा जुटेको बताइन्छ। यसका लागि आवश्यक पर्ने स्वास्थ्य परीक्षणहरू पनि भइरहेको उनी निकटस्थहरु बताउँछन्।

प्रधानमन्त्री ओलीको १३ वर्षअघि दिल्लीको एपोलो अस्पतालमा मिर्गौला प्रत्यारोपण गरिएको थियो । प्रत्यारोपित मिर्गौैलाको कार्यक्षमतामा ह्रास आएपछि नियमित डायलाइसिस गराउँदै आएका छन् ।

मिर्गौला प्रत्यारोपणपूर्व जन्मथलो जाने इच्छा राखेकाले जन्मदिनको अवसरमा त्यसको मेसो मिलाइएको हो। आफ्नो पुर्ख्यौली घरजग्गालाई ट्रष्टको रूपमा विकास गर्ने ओलीको योजना छ। त्यहाँ प्राविधिक शिक्षालय खोल्ने आफ्नो इच्छा रहेको उनले बताउने गरेका छन्।

प्रतिक्रिया दिनुहोस्