काठमाडौं- स्टार खेलाडी लिओनल मेस्सीको कीर्तिमानी ह्याट्रिकमा बार्सिलोनाले स्पेनिस ला लिगामा रियाल मालोर्कामाथि ५-२ गोलको सहज जित निकालेको छ।
शनिबार राति बार्सिलोनाको घरेलु मैदानमा भएको खेलमा मेस्सीले ३ गोल गर्दा युरोपको शीर्ष पाँच लिगमा पछिल्ला १४ सिजनमा १० भन्दा बढी गोल गर्ने पहिलो खेलाडी बनेका छन्।
उनले क्रिस्टियानो रोनाल्डोले ला लिगामा बनाएको ३४ ह्याट्रिकको कीर्तिमानसमेत तोडेका छन्।
मालोर्काविरुद्धको खेलमा मेस्सीले खेलको १७औं, ४१औं र ८३औं मिनेटमा गोल गर्दै ह्याट्रिक गरेका थिए। त्यसअघि एन्टोनी ग्रिजमानले सातौं मिनेटमा गोल गर्दै बार्सिलोनालाई अग्रता दिलाएका थिए। लुइस सुवारेजले ४३औं मिनेटमा बार्सिलोनाका लागि १ गोल गरेका थिए।
मालोर्काका लागि एन्टे बुडिमिरले खेलको ३५औं र ६४औं दुई गोल गरे।
जितसँगै बार्सिलोना १५ खेलबाट ३४ अंकका साथ लिगको शीर्ष स्थानमा छ। समान खेल र अंक भए पनि रियाल मड्रिड गोलअन्तरको आधारमा दोस्रो स्थानमा छ।
शनिबार रातिकै खेलमा रियाल म्याड्रिडले इस्पानियोललाई २-० गोलले पराजित गर्दै ३ अंक जोडेको छ।