काठमाडौं– १३ औं दक्षिण एसियाली खेलकुद (साग)अन्तर्गत महिला क्रिकेटमा नेपालले कास्य पदक जितेको छ।
पोखरा रंगशालास्थित क्रिकेट मैदानमा कास्य पदकका लागि आज भएको खेलमा माल्दिभ्सलाई १० विकेटले पराजित गर्यो।
टस जितेर पहिले ब्याटिङ गरेको माल्दिभ्सले ११.३ ओभरमा सबै विकेट गुमाएर आठ रन मात्रै बनाउन सक्यो। ९ रनकाले लक्ष्य पछ्याएको नेपालले १.२ ओभरमै लक्ष्य पूरा गर्यो ।
माल्दिभ्सलाई सस्तैमा समेट्न ‘प्लेयर अफ दी म्याच’ बन्न सफल अञ्जली चन्दले चार ओभरमा एक रन खर्चेर चार विकेट लिइन्। नेपाली टोलीका प्रशिक्षक जगत टमाटाले स्वर्णको लक्ष्य पूरा नभए पनि खेलाडीले राम्रो प्रदर्शन गरेको बताए।
नेपाली टोलीका कप्तान रुविना क्षेत्रीले प्रतियोगिताबाट सिक्ने अवसर मिलेको बताइन्।
सागअन्तर्गत महिला क्रिकेटको फाइनलमा आइतबार श्रीलंका र बंगलादेश भिड्दैछन्।
प्रतियोगितामा नेपालसहित बंगलादेश, श्रीलंका र माल्दिभ्सको सहभागिता थियो।