काठमाडौं। जारी १३ औं दक्षिण एसियाली खेलकुद प्रतियोगिता (साग) को सातौं दिन आज शनिबार १८ खेल हुँदैछन् । आज काठमाडौं, पोखरा र जनकपुर तीनै ठाउँमा प्रतिस्पर्धा हुँदैछन् ।
आर्चरी, एथ्लेटिक्स, बास्केटबल, फुटबल, क्रिकेट, ह्यान्डबल, कबड्डी, साइक्लिङ, पौडी, सुटिङ, जुडो, टेनिस, बिच भलिबल, भारोत्तोलन, स्क्वास, कुस्ती, बक्सिङ र फेन्सीङको प्रतिस्पर्धा आज हुनेछ ।
महिला फुटबल, महिला क्रिकेट, भारोत्तोलन, बिच भलिबल, आर्चरी र ह्यान्डबल पोखरामा हुनेछ भने कुस्ती जनकपुरमा हुनेछ । बाँकी अन्य खेल काठमाडौंमा हुनेछन् ।
पदक तालिकामा नेपाललाई भारतले उछिनिसकेको छ । दोस्रो स्थानमा नेपाल छ ।
कुन खेल कहाँ ?
पुरुष फुटबलमा आज त्रिपुरेश्वरस्थित दशरथ रंगशालामा नेपालले तेस्रो खेलमा माल्दिभ्सको सामना गर्दैछ । खेल दिउँसो साढे एक बजे हुनेछ । यस्तै अर्को खेलमा श्रीलंका र भुटानबीच प्रतिस्पर्धा हुनेछ । उक्त खेल साँझ साढे ५ बजे हुनेछ ।
महिलातर्फ नेपाल र भारतबीचको खेल पोखरा रंगशालामा दिउँसो ४ बजे हुनेछ ।
पुरुष क्रिकेटमा आज नेपालले बंगलादेशको यू २३ टिमको सामना गर्नेछ । अर्को खेलमा भुटान र माल्दिभ्स खेल्नेछ ।
सुटिङतर्फ शनिबार दुई खेल छन् । सागको सातौं दिन दुई प्रतिस्पर्धामा फाइनल हुँदैछ ।
स्क्वासतर्फ शनिबार पुरुष तथा महिलातर्फको सेमिफाइनल खेल रहेको छ । महिलातर्फ भारत र पाकिस्तान भिड्दैछन् । पुरुषतर्फ दुबै सेमिफाइनलमा भारत र पाकिस्तानबीच प्रतिस्पर्धा हुँदैछ ।
जुडोको खेलको औपचारिक सुरुवात शनिबार हुँदैछ । तर, प्रतिस्पर्धाहरु भने आइतबारबाट सुरु हुनेछ ।
बक्सिङमा शनिबार विभिन्न १४ खेलहरु हुनेछ । जसमा नेपालले ५ इभेन्टमा प्रतिस्पर्धा गर्नेछ ।
ह्याण्डबलमा शनिबार सेमिफाइनलको खेल हुनेछ । महिलाको सेमिफाइनलमा नेपाल र पाकिस्तान तथा भारत र बंगलादेश भिड्नेछन् ।
आर्चरीमा शनिबार विभिन्न खेलहरु हुने छ । शनिबार टिमतर्फ सेमिफाइनलका खेलहरु र एकलतर्फ भने क्वाटरफाइनलका खेलहरु हुनेछ ।
साइक्लिङ अन्तर्गत शनिबार पनि विभिन्न खेल हुनेछ । साइक्लिङको इलाइट स्पर्धामा शनिबार पुरुषमा १ सय किलोमिटर तथा महिलामा ८० किलोमिटर दूरीमा प्रतिस्पर्धा हुनेछ ।