काठमाडौं– गण्डकी मेडिकल कलेजबाट परीक्षा बहिष्कार गरी बाहिर निस्किएका ९ विद्यार्थी बिहीबार पक्राउ परेका छन्।
चिकित्सा शिक्षाको प्रथम वर्षको परीक्षा बहिष्कार गरी बाहिर निस्किएपछि उनीहरूलाई कास्की प्रहरीले पक्राउ गरेको हो।
कास्की प्रहरीले कलेज परिसरमा हुलहुज्जत गर्ने विद्यार्थीलाई पक्राउ गरेको जनाएको छ।
विद्यार्थीले भने प्रश्नपत्र बाहिरिएपछि परीक्षा बहिष्कार गर्नुपरेको विद्यार्थीले बताएका छन्। कलेज प्रमुख रविन्द्रप्रसाद श्रेष्ठ र सीईओ कृष्ण घिमिरेले प्रश्नपत्र सार्वजनिक गरेको कलेजका एक विद्यार्थीले आरोप लगाए। कलेज प्रमुख श्रेष्ठका छोरा र सीईओ घिमिरेकी छोरी परीक्षा दिने भएकाले प्रश्नपत्र सार्वजनिक गरिएको ती विद्यार्थीको भनाइ छ।
प्रश्नपत्र बाहिरिएको भन्दै विद्यार्थीले आन्दोलन गरेका थिए। सो क्रममा आन्दोलनरत विद्यार्थी र प्रहरीबीच झडप समेत भएको थियो। झडपमा परी दुई विद्यार्थीसमेत घाइते भएका छन्।