बागलुङ जिप दुर्घटनामा मृत्यु हुनेको पहिचान खुल्यो

काठमाडौं– बाग्लुङको बडिगाडमा भएको जिप दुर्घटनामा मृत्यु हुनेको पहिचान खुलेको छ। दुर्घटनामा चालकसहित १४ जनाको घटनाास्थलमै मृत्यु भएको थियो । एकजनालाई बडिगाड खोलाले बगाएर वेपत्ता बनाएको छ।

जिपमा १८ जना सवार थिए । घाइते ३ जनालाई थप उपचारका लागि काठमाडौं ल्याइएको छ । गुल्मीको इस्माबाट कुलपूजाका लागि बागलुङको देवीस्थान जाँदै गरेको ग १ ज ५२१९ नम्बरको जिप बडिगाड गाउँपालिका–७ घोपर्नाबाट खोलामा खसेको थियो ।

दुर्घटनामा मृत्यु हुनेमा गुल्मी इस्मा गाउँपालिका–५ का २५ वर्षीय चालक रेशम थापा, सोही गाउँपालिका– ५ का २३ वर्षीया माया थापा, इस्मा–५ का ४० वर्षीया वसुन्धरा कार्की, इस्मा–५ कै ४० वर्षीया सीता कार्की, सोही गाउँपालिकाका ४५ वर्षीय भूमि कार्की, २५ वर्षीया मिना कार्की, उमेर नखुलेका तुलसी कार्की र धनबहादुर कार्की रहेका छन् । त्यसैगरी इस्माकै ४० वर्षीय छवि कार्कीको मृत्यु भएको छ ।

दुर्घटनामा नवलपरासी बर्दघाटकी झुमा कार्की, बागलुङ बडिगाड–५ की ५५ वर्षीया लक्ष्मी केसीको पनि मृत्यु भएको प्रहरीले जनाएको छ । ठाउँ वतन नखुलेका सूचना कार्की रहेका छन् ।

दुर्घटनामा ज्यान गुमाएका पाँच वर्षीया बालिका र थप एकजनाको सनाखत हुन बाँकी छ ।

दुर्घटनामा नवलपरासी बर्दघाटका जीवन कार्की, रोल्पा घर, इस्मा माइती भएकी नीमा कार्की, इस्माकै हिमाल कार्की दुर्घटनामा घाइते भएका छन् ।