गढीमाईमा बलि दिन सुरु, ६५ प्रतिशत पशु भारतीय भक्तजनबाट

बारा- प्रत्येक पाँच वर्षमा आयोजना हुने बाराको गढीमाई मेलामा आज (मंगलबार) देखि बलि दिन सुरु भएको छ।

मंसिर १ गते सुरु भएको मेलामा पशु अधिकारकर्मीको विरोधका बाबजुद बलि दिन सुरू गरिएको हो। दुई दिनसम्म दिइने बलिका लागि भक्तजनले ठूलो संख्यामा राँगा, बोका तथा परेवा ल्याएको मेला व्यवस्थापन समितिले जनाएको छ।

सोमबार राति ब्रह्म स्थानमा बोका, मुसा, कुखुरा, सुंगुर, हाँस र बनारसका डोम राजाले पठाएको राँगाको बलि दिएपछि बलि खुलेको छ ।

१८ गते अन्य बलि आ–आफ्ना सुविधाअनुसार दिइने मन्दिरका पुजारी मंगल चौधरी थारुले जानकारी दिए। मेलामा बली चढाउनेमध्ये ६५ प्रतिशत पशु भारतीय भक्तजनले ल्याउने गरेको मेला व्यवस्थापन मूल आयोजक समितिले जनाएको छ।

भारतको सीतामढी, बैरगेनीया, घोडासन, आदापुर रक्सौललगायत सीमवर्ती सहरबाट बोका, मुसा, कुखुरा, सुंगुर, हाँससहित ठूलो संख्यामा भक्तजन आउँछन् । यस्तै नेपालका मध्य तथा पूर्वी तराईसहित विभिन्न जिल्लाबाट भक्तजनले गढीमाईको दर्शन गर्नेछन्।

मेलाको सुरक्षाका लागि नेपाल प्रहरी, सशस्त्र प्रहरी र राष्ट्रिय अनुसन्धान विभागका सुरक्षाकर्मीलाई खटाइएको बाराका प्रमुख जिल्ला अधिकारी फणीन्द्रमणि पोखरेलले बताए।

मेलाका लागि ७२ सदस्यीय मूल व्यवस्थापन समिति र १४ वटा उपसमिति बनाइएको छ। बलिको समयमा दसौं लाख भक्तजनले गढीमाईको दर्शन गर्ने अपेक्षा छ।

मेला व्यवस्थापन मूल समितिका महासचिव मोतीलाल कुशवाहाले पशुबलिको समयमा भक्तजनको भीड लाग्ने हुँदा त्यसैअनुसारको तयारी भइरहेको बताएका छन् । मेलामा ७० लाखभन्दा बढी भक्तजन आउने अनुमान छ।