काठमाडौं– अछामको साफेबगरमा छाउ गोठमा रहेकी एक महिलाको ज्यान गएको छ।
साफेबगर नगरपालिका-३ सिद्देश्वरकी २१ वर्षीया पार्वती रावतको गोठमा सुतिरहेका बेला आईतवार राति ज्यान गएको हो।
गोठमा एक्लै सुतेकी पार्वती बिहान अवेरसम्म बाहिर नआएपछि परिवारले ढोकाखोलेर हेर्दा मृत अवस्थामा भेटिएको वडा अध्यक्ष कृष्ण बहादुर बुढाले जानकारी दिए।
मृतकका पति करन रावत रोजगारीका क्रममा भारतमा छन् ।
इलाका प्रहरी कार्यालय साफेबगरका प्रहरी निरीक्षक नरपती भट्टले मृतकको शरीरमा वाहिरी चोटपटक केही नदेखिएको र थप अनुसन्धान भैरहेको बताए।
नगरपालिकाले साफेबगरलाई छाउपडी मुक्तक्षेत्र घोषणा गरेको छ।
अछाममामात्रै पछिल्लो एक दशकमा छाउ गोठमा १५ जना महिलाको ज्यान गइसकेको छ।