शनिबार, फागुन १७, २०७६

समाचार अर्थ

दाताले दिएको बजेट पनि खर्चन सकेन सरकारले

दाताले दिएको बजेट पनि खर्चन सकेन सरकारले

काठमाडौं । सरकारले दातृ निकायले दिएको रकमसमेत खर्च गर्न नसकेको देखिएको छ । अर्थ मन्त्रालयले सार्वजनिक गरेको मध्यावधि समीक्षामा सरकारले दातृ निकायबाट पाएको रकम पूर्ण रुपमा खर्च हुन नसकेको देखिएको हो ।

चालू आर्थिक वर्षको ६ महिना कटिसक्दा दातृ निकायले दिएको ऋणको करिब ५० प्रतिशत रकम खर्च भइसक्नुपर्ने थियो, तर एउटाबाहेक अन्य निकायले यस्तो रकम खर्च गर्न सकेका छैनन् ।

अर्थ मन्त्रालयका अनुसार आर्थिक वर्षको पहिलो ६ महिनामा नेपालमा सबैभन्दा बढी ऋण तथा अनुदान सहयोग दिने विश्व बैंकले दिएको रकम १४.५ प्रतिशतमात्र खर्च भएको छ । विश्व बैंकले चालू आर्थिक वर्षको लागि नेपाल सरकारलाई १ खर्ब १८ अर्ब रुपैयाँ ऋण तथा अनुदान दिएको छ ।

त्यस्तै दोस्रो धेरै रकम दिने दातृ निकायमा एसियाली विकास बैंक छ । उसले दिएको ८० अर्ब ऋणमध्ये २३.८ प्रतिशतमात्र खर्च भएको छ । त्यस्तै चीनको एक्जिम बैंकले दिएको १० अर्ब रुपैयाँमध्ये ५१ प्रतिशत खर्च भएको छ भने जापानले दिएको ८ अर्ब ८७ करोड ऋणमा ४१ .९ प्रतिशत खर्च भएको छ ।

त्यसैगरी एसएसडिपी (बहुदाता कोष)ले दिएको ११ अर्ब रुपैयाँको २६.९ प्रतिशत र भारत एक्जिम बैंकले दिएको ५८ अर्ब ४८ लाखमध्ये ४.७ प्रतिशत खर्च भएको छ ।

त्यस्तै चीनले पाँच अर्ब रुपैयाँ दिएकोमा सरकारले ४५.२ प्रतिशतमात्र खर्च गरेको छ भने भारतले १० अर्ब रुपैयाँ दिएकोमा १४.२ प्रतिशत, जापानले दिएको पाँच अर्ब २३ करोडमा २६.१ प्रतिशत र दाताको संयुक्त कोषबाट नेपाललाई आएको ७ अर्ब ८७ करोड रुपैयाँ ऋण तथा अनुदानमा १६.८ प्रतिशतमात्र खर्च भएको अर्थ मन्त्रालयले जनाएको छ ।

प्रतिक्रिया दिनुहोस्