सल्यान- सल्यानको कुमाख गाउँपालिका वडा नम्बर ५ को वडाध्यक्षको लागि शनिबार भएको उपनिर्वाचनमा ६१ प्रतिशत मत खसेको छ।
कुल मतदाताको ६१ दशमलब १२ प्रतिशत अर्थात् १ हजार १ सय २४ मत खसेको जिल्ला निर्वाचन कार्यालय सल्यानका प्रमुख हरिबहादुर बुढाथोकीले जानकारी दिए।
उनका अनुसार सरस्वती माध्यमिक विद्यालय झारकाँडामा रहेको मतदान स्थलको (क) केन्द्रमा पुरुष २ सय ८१ र महिला ३ सय १२ गरेर जम्मा ५ सय ९३ र (ख) मतदान केन्द्रमा पुरुष २ सय ४३ र महिला २ सय ८८ गरेर जम्मा ५ सय ३१ मत खसेको छ।
त्यहाँ १ हजार ८ सय ३९ मतदाता रहेका छन्। वडाध्यक्षका लागि नेकपाका धर्मे बुढाथोकी, नेपाली कांग्रेसका खड्गबहादुर बोहरा र राप्रपाका गोपाल शाह उम्मेदवार छन्।
शनिबार नै राती १० बजेसम्म मतगणनासक्ने गरी मुख्य निर्वाचन अधिकृतको कार्यालयमा मतगणना गरिने तयारी थालिएको छ।