इटहरी - प्रदेश १ मा १० जनप्रतिनिधि चुन्न उपनिर्वाचन जारी छ। ३ स्थानीय सरकार प्रमुख र ७ वडा अध्यक्ष चुन्न बिहान ७ बजेबाट मतदान भइरहेको हो। सुनसरीको धरान उपमहानगरपालिका, संखुवासभाको मकालु गाउँपालिका र पाँचथरको फाल्गुनन्द गाउँपालिका प्रमुखसहित अन्य सात वडा अध्यक्षको लागि चुनाव भैरहेको हो।
२०७४ पुस ३० मा मकालु गाउँपालिका अध्यक्ष खड्ग बहादुर कट्वाल, २०७५ श्रावण १ मा धरानका मेयर तारा सुब्बा र २०७५ माघ २६ मा फाल्गुनन्द गाउँपालिका प्रमुख अमर बहादुर नेम्बाङको निधन भएकोले उपनिर्वाचन भएको हो।
उपनिर्वाचन हुने वडा अध्यक्ष पदहरुमा संखुवासभाको खादवारी नगरपालिका ३, पाँचथरको हिलिहाङ गाउँपालिका ७, धरान उपमहानगरपालिका ७, मोरङको धनपालथान गाउँपालिका २ रहेका छन्। संखुवासभाको खादवारी गाउँपालिका ३ का अध्यक्ष तोयानाथ ढुङ्गानाको २०७४ फागुन १३, हिलिहाङ ७ का अध्यक्ष तिर्थराज तिम्सिनाको २०७४ चैत १६, धरान ७ का अध्यक्ष भुवन मोक्तानको २०७५ जेष्ठ २ र २०७५ जेष्ठ २५ मा धनपालथान २ अध्यक्ष बलिराम भगतको मृत्यु भएपछि उपनिर्वाचन भएको हो।
यसैगरी, पाँचथरको फिदिम नगरपालिका १, भोजपुरको पौवादुम्मा गाउँपलिका १ र खोटाङको साकेला गाउँपालिका ३ मा पनि उपनिर्वाचन हुँदैछ। २०७६ बैशाख ९ मा साकेला गाउँपालिका ३ अध्यक्ष मणिकुमार राई, २०७६ श्रावण ६ मा पाँचथरको फिदिम गाउँपालिका १ का अध्यक्ष हर्क मोक्तान र २०७६ श्रावण १६ मा भोजपुरको पौवादुम्मा गाउँपालिका १ का अध्यक्ष रुद्र बहादुर पान्डेको निधन भएकोले उपनिर्वाचन हुँदैछ।
प्रदेश १ का १० जनप्रतिनिधिको लागि आज भएको उपनिर्वाचनमा १ सय ५४ मतदान केन्द्र छन्। सबै मतदान केन्द्रमा पर्याप्त सुरक्षा भएको प्रदेश १ प्रहरी कार्यालय विराटनगरका प्रवक्ता प्रहरी बरिष्ठ उपरीक्षक शेखर कोइरालाले बताए।