लागुऔषध किनबेच हुँदैगर्दा प्रहरी पुगेपछि...

सुर्खेत - बिहानको करिब ११ बजे। वीरेन्द्रनगर-१० स्थित दिपचन्द्र होटलको कोठा नम्बर १०६। जहाँ लागुऔषधको मोलमोलाई चलिरहेको थियो। करिब दुई केजी अर्थात १ केजी ९ सय ३० ग्राम लागुऔषध (चरेस) को किनबेचको अन्तिम तयारीमा थियो। तर, खरिदबिक्री हुन नपाउँदै जब प्रहरी कोठामा पुग्यो खरिदबिक्रीका लागि तयार भएका उनीहरु आत्तिए। प्रहरी नै त्यहाँ पुगेपछि किनबेच हुन नपाउँदै उनीहरु प्रहरीको फन्दामा परे।

लागुऔषध किनबेच हुँदै गरेको विशेष सूचनाका आधारमा जिल्ला प्रहरी कार्यालयबाट खटिएको टोलीले जाजरकोट जुनिचाँदे गाउँपालिका-९ का नैनबहादुर शाही, सुर्खेतको वीरेन्द्रनगर-१२ का तुलसा शाही र जुम्लाको तातोपानी गाउँपालिका-७ का नैन शाहीलाई पक्राउ गरेको छ।

जाजरकोटका शाहीले गाउँबाट बिक्री गर्नका लागि लागुऔषध सुर्खेत ल्याएका थिए। पक्राउ परेका तीन जनालाई जिल्ला प्रहरी कार्यालय सुर्खेतमा राखिएको छ। उनीहरु लागुऔषधको कारोबार गिरोह नै हुनसक्ने सुर्खेतका डीएसपी रवि रावलले बताए।