जनकपुरधाम - सर्लाही सदरमुकाम मलंगवास्थित जिल्ला अस्पतालमा शुक्रबार आगलागी भएको छ। विद्युत सर्ट भएर अस्पतामा आगलागी भएको बताइएको छ।
आगलागीबाट करिब ७ लाख बराबरको क्षति भएको जिल्ला प्रहरी कार्यालय सर्लाहीले जनाएको छ। आगलागीबाट अस्पतालको कम्प्युटर, ल्यापटप, फ्रिजलगायताका उपकरणका साथै औषधिसमेत जलेको छ।
अस्पतालको माथिल्लो तल्लाबाट सुरु भएको आगलागी प्रहरी, स्थानीयवासी, अस्पतालका कर्मचारीको प्रयासबाट नियन्त्रणमा लिइएको छ। करिब आधा घण्टाको प्रयासपछि आगलागी नियन्त्रणमा आएको थियो। मलंगवा नगरपालिका कार्यालयमा दमकल नहुँदा आगलागी नियन्त्रण गर्न समय लागेको थियो।