भारतको हैदराबादमा २७ वर्षीया युवती डा. प्रियंका रेड्डीलाई यौन उत्पीडनपछि जिउँदै जलाइएको घटना सार्वजनिक भएको छ । आफ्नो स्कुटरको टायर पङ्क्चर भएपछि अटोमा चढेर घर जान खोज्दा यो घटना भएको हो ।
तेलेगु मिडियाका अनुसार दुई व्यक्तिले पङ्क्चर ठीक गरिदिने बताए र स्कुटर लिएर गए । यो कुरा प्रियंकाले बहिनीलाई फोनमा बताइन् । त्यहीबीचमा केही व्यक्ति देखा परे र उनलाई ट्रकमा लिएर गए । त्यसपछि उनको फोन अफ भएको थियो ।
प्रियंका हराएपछि परिवारले स्थानीय प्रहरी चौकीमा निवेदन दियो । भोलिपल्ट बिहान प्रहरी चौकी नजिकै निर्माणाधीन पुलमुनि आधा जलेको महिलाको शव भेटिएको खबर आयो ।
१०० मिटर टाढा प्रियंकाको चप्पल, सल र भित्री वस्त्र बरामद भयो, जसका आधारमा परिवारले प्रियंकाको पहिचान गरेको थियो । प्रियंकामाथि बलात्कार भएको आशंका छ ।
प्रहरीले घटनाको छानबिन भइरहेको जनाएको छ । अहिलेसम्म कोही पक्राउ परेको छैन । बलात्कारको सम्भावना देखिए पनि पुष्टि भने नभएको प्रहरीको भनाइ छ ।
बीबीसी