न्युयोर्क- अमेरिकी राष्ट्रपति जो बाइडेनले अफगानिस्तानको युद्ध अन्त्य गर्न सेना फिर्ता गर्नु नै उत्तम विकल्प भएको बताएका छन्। मंगलबार टेलिभिजनमार्फत् सम्बोधन गर्दै राष्ट्रपति बाइडेनले यस्तो बताएका हुन्।
काबुलबाट सेना फिर्तागर्नुभन्दा उत्तम विकल्प अरु कुनै पनि नभएको उनले उल्लेख गरे। 'हामीले अफगानिस्तानको युद्धलाई थप लम्ब्याउन चाहेनौँ। अमेरिकी सेना फिर्ता गर्ने विषयलाई पर धकेल्न चाहेनौँ,' टेलिभिजनबाट प्रसारण भएको सम्बोधनमा उनले भनेका थिए।
अमेरिकी सेनाले मंगलबार नै काबुल छोडेको थियो। अमेरिकाले २० वर्ष लामो युद्ध अन्त्य गर्दै मंगलबार सबै सेना फिर्ता गरेको थियो।
उता अमेरिकी सेना फिर्ता भएपछि तालिवानले भने खुशीयाली मनाएको छ। अफगानिस्तान स्वतन्त्र र संम्प्रमुतासम्पन्न राष्ट्र बनेको भन्दै उनीहरूले खुशीयाली मनाएका हुन्।
तालिवानका प्रवक्ता जाबिहुल्लाह मुजाहिदले आफूहरूको विजयबाट अमेरिकाले पाठ सिक्नुपर्ने उल्लेख गरेका छन्।