काठमाडौं – नयाँ वानेश्वरमा डाक्टरलाई ठक्कर दिएर भागेको बस र चालकलाई प्रहरीले रामेछापबाट पक्राउ गरेको छ।
सीसीटीभी फुटेजका आधारमा ठक्कर दिएर भागेको बा३ख ६१४ नम्बरको यात्रुवाहक बस र भक्तपुर सूर्यविनायकका घर भएका बस चालक बुद्धिकुमार कोजुलाई सोमबार रामेछापबाट पक्राउ गरिएको महानगरीय प्रहरी परिसर काठमाडौंका प्रवक्ता डिएसपी होबिन्द्र बोगटीले जानकारी दिए।
‘सीसीटीभीको फुटेज हेर्दा दुर्घटना भएको समयमा त्यही बस चलेको देखिएको छ’ वोगटीले भने,‘बस र चालक दुबैलाई पक्राउ गरि काठमाडौं ल्याइएको छ।’ उनले थप अनुसन्धान भैरहेको जानकारी दिए।
आइतबार बिहान नयाँ वानेश्वरस्थित सिभिल अस्पतालमा कार्यरत डाक्टर प्रभु जोशीको ‘मर्निङ वाक’मा निस्किएको बेला गाडीको ठक्करमा ज्यान गएको थियो।