प्रदेश १ मा दल सनाखतका लागि ८ सांसद पुगे निर्वाचन आयोग

विराटनगर- प्रदेश १ मा माधवकुमार नेपाल नेतृत्वको नेकपा एकीकृत समाजवादी पार्टी सनाखतका लागि ८ जना प्रदेश सांसद निर्वाचन कार्यालय विराटनगर पुगेका छन्। 

१० जना प्रदेश सांसदहरूले एकीकृत समाजवादीमा सनाखत गर्ने बताइएकोमा ८ जना आयोग पुगिसकेको सांसद राजेन्द्र राईले जानकारी दिए। उनले कृष्णकुमारी राई र उपेन्द्र घिमिरे बाहेक ८ जना पुगिसकेको बताए। दुई जना पनि केही बेरमा पुग्ने उनको दाबी छ।

एमाले छाडेर प्रदेश सांसदहरू समाजवादीमा थपिने भएका हुन्। भदौ २२ गतेसम्म दल रोज्न पाइने छ। अझै समय भएकाले सनाखत पछि पनि थपिने सांसदहरूको सनाखत अर्को दिन गरिने उनले बताए। 

उनका अनुसार एकीकृत समाजवादी पक्षमा राजेन्द्र राई, गणेशकुमार काम्बाङ, सावित्राकुमारी रेग्मी, सरिता थापा खड्का, कृष्णकुमारी राई, सुनिता चौधरी, खिनु लङ्वा लिम्वु, पदमकुमारी गुरुङ र राजन राई छन्।