भैरहवा- पाल्पा जिल्ला समन्वय समिति प्रमुख दयाराज बस्यालको निधन भएको छ। उनको काठमाडौं महाराजगन्जस्थित त्रिवि अस्पतालमा उपचारका क्रममा ६६ वर्षकाे उमेरमा निधन भएको हो।
बस्याल तत्कालीन एमालेको तर्फबाट स्थानीय निर्वाचनमा बगनासिकाली गाउँपालिका-६, यम्घाको सदस्यमा निर्वाचित भई पछि जिसस प्रमुख भएका थिए।
पटक–पटक जेल जीवन बिताएका बस्याल ०४३ सालमा जनपक्षिय राष्ट्रिय पञ्चायतको सदस्य, ०४८ सालमा नेकपा एमालेको तर्फबाट क्षेत्र नम्बर २ बाट संसद् उम्मेदवार भएका थिए। तर, उनी संसद्मा पराजित भएका थिए।
उनी ०५४ सालमा नेकपा एमालेको पाल्पा जिल्ला सचिव भएका थिए।
उनको अन्त्येष्टी पाल्पामै हुने सत्तारुढ नेकपाका जिल्ला अध्यक्ष नारायण आचार्यले बताए। अध्यक्ष आचार्यका अनुसार बस्यालको आज बिहान साढे ७ बजे जिसस परिसर र ९ बजे तानसेन टुँडिखेलमा श्रद्धाञ्जली कार्यक्रम हुनेछ।