काठमाडौं– मन्त्रिपरिषद् पुनर्गठनको तयारी गरिरहेका प्रधानमन्त्री केपीशर्मा ओली र उपसभामुख शिवमाया तुम्हाम्फेबीच भेटवार्ता भएको छ।
यसअघि उपसभामुख तुम्बाहम्फेलाई राजीनामा गराएर मन्त्री बनाउने विषयमा नेकपाका अध्यक्षद्वय ओली र प्रचण्डबीच छलफल भएको थियो। आज सोही बमोजिम प्रधानमन्त्री ओलीले उपसभामुखलाई राजीनामा गर्न भनेको बुझिएको छ।
तर, अहिले सभामुखको पद रिक्त भएका बेला उपसभामुखले पदबाट राजीनामा गर्न नमिल्ने भन्दै तुम्हाम्फेले यसबारे हतार नगर्न प्रधानमन्त्रीलाई आग्रह गरेको उपसभामुखका प्रेस सल्लाहकार शेखर अधिकारीले जानकारी दिए।
अधिकारीका अनुसार उपसभामुख तुम्बाहम्फेले यसबारे प्रधानमन्त्रीसँग पछि छलफल गर्ने बताएकी छन् ।
यसअघि तुम्बाहम्फेले आफू सभामुख बन्नेबाहेक अन्य शर्तमा राजीनामा नगर्ने बताउँदै आएकी थिइन् ।