नेपाल-भारत सीमा सुरक्षा बैठक आजबाट : कालापानीबारे छलफल नहुने

काठमाडौं- नेपाल-भारत सीमा विवाद चर्किदै गएका बेला आजदेखि पोखरामा सीमा सुरक्षा बैठक सुरु हुँदैछ ।

बैठकमा नेपालको सशस्त्र प्रहरी बल र भारतको सीमा सुरक्षा बल (एसएसबी)का प्रमुखसहितका अधिकारीहरु सहभागी हुँदैछन् ।

हरेक वर्ष आयोजना हुनुपर्ने बैठक तीन वर्षपछि बस्न लागेको हो । २०६९ सालयता जम्मा तीनपटक सीमा सुरक्षा बैठक बसेको छ ।

आजबाट शुक्रबारसम्म तीन दिन चल्ने बैठकमा सीमा क्षेत्रमा हुने अपराध, अवैध ओसारपसार नियन्त्रण, संयुक्त सुरक्षा गस्तीलगायतका विषयमा छलफल हुनेछ। तर, भारतले अतिक्रमण गरेको कालीपानीलगायतका क्षेत्रको विषयमा भने बैठकमा छलफल नहुने भएको छ ।

नेपालको लिम्पियाधुरादेखि लिपुलेकसम्मको क्षेत्रलाई भारतले आफ्नो राजनीतिक नक्सामा समेटेपछि त्यसको नेपालमा चर्को विरोध हुँदै आएको छ । यस विषयमा सीमा सुरक्षा बैठकमा छलफल हुने अपेक्षा राखिए पनि भारतीय पक्षले नमानेपछि छलफल नहुने भएको हो ।

भारतीय सीमा सुरक्षा बलका अधिकारीहरुले नक्साको विषय राजनीतिक भएको टिप्पणी गरेका छन् ।

पछिल्लो समय लिम्पियाधुरदेखि लिपुलेकसम्मको क्षेत्रलाई समेटेर भारतले जारी गरेको नयाँ नक्साका विषयमा बैठकमा छलफल नहुने भएको छ।

सीमा सुरक्षाको विषयमा मात्रै छलफल हुने भएकाले यो बैठकमा कालापानी क्षेत्र भारतले हडपेको विषयमा छलफल गर्ने कुनै तयारी नभएको गृह मन्त्रालय स्रोतले जनाएको छ ।