काठमाडौं । गठन भएको करिब २१ महिनापछि मन्त्रिपरिषद् पुनर्गठन हुने भएको छ ।
लामो समयदेखि मन्त्रिपरिषद् पुनर्गठनको चर्चा चले पनि यसले मूर्त रुप पाएको थिएन । आज (मंगलबार) भने प्रधानमन्त्री केपी शर्मा ओलीले मन्त्रिपरिषद् पुनर्गठन गर्ने बताएका छन् ।
मंगलबार बेलुका प्रधानमन्त्रीको सरकारी निवास बालुवाटारमा बसेको मन्त्रिपरिषद् बैठकमा भोलि (बुधबार) मन्त्रिपरिषद् पुनर्गठन गर्ने जानकारी गराएको बैठकमा सहभागी एक मन्त्रीले बताए । प्रधानमन्त्री ओलीले बुधबार कुनै पनि औपचारिक कार्यक्रममा जाने सेड्युल नराख्न मन्त्रीहरुलाई निर्देशन पनि दिएको बताइएको छ ।
मन्त्रीहरुको नाम नलिई प्रधानमन्त्रीले ‘तपाईँहरु कोही पर्नुहोला, कोही नपर्नुहोला । अहिलेसम्म सहयोग गर्नुभएकोमा धन्यवाद’ भनेको ती मन्त्रीले बताए ।
प्रधानमन्त्री ओलीले यसअघि नेकपा सचिवालयको पछिल्लो बैठकमा पनि मन्त्रीहरु परिवर्तन गर्ने बताएका थिए ।
सोमबार नै मन्त्रिपरिषद् पुनर्गठन गर्ने तयारी भए पनि नेकपाका दुई अध्यक्षबीच मन्त्रीहरुको नाममा सहमति नजुट्दा रोकिएको थियो । त्यसपछि पनि निरन्तर वार्ता भएपछि सहमति जुटेको बताइएको छ ।
बुधबार बिहान नेकपा सचिवालय पनि बोलाइएको छ । सचिवालयको बैठकपछि दिउँसोसम्ममा मन्त्रिपरिषद् पुनर्गठन र नयाँ मन्त्रीको शपथ हुने बताइएको छ ।
ओली २०७४ फागुन ३ गते प्रधानमन्त्रीमा नियुक्त भएका थिए ।