प्रहरीले फेला पार्‍यो आधुनिक हतियार, आशंका विप्लवमाथि

दाङ - जिल्ला प्रहरी कार्यालय दाङले बेवारिसे अवस्थामा रहेका ५ थान एसएमजी(सट मेसिनगन) बरामद गरेको छ। जिल्ला प्रहरी कार्यालय दाङले दिएको जानकारी अनुसार सटमेसिनगनको साथमा त्यसमा लाग्ने १३ थान म्याग्जिन र ३ सय ९० थान गोलीसमेत बरामद भएको छ।

उक्त हतियार दाङ र कपिलवस्तुको सीमामा रहेको जंगलमा खाली गोठबाट सुटकेसमा लुकाई राखेको अवस्थामा बरामद गरिएको जिल्ला प्रहरी प्रमुख प्रहरी उपरीक्षक जनकप्रसाद भट्टराईले जानकारी दिए। हतियार कसले लुकाई राखेको हो भन्ने एकिन नभएपनि नेत्र बिक्रम चन्द बिप्लव समूहले हतियार ओसारपसार गर्दैछ भन्ने सूचनाका आधारमा सर्च गर्दा भेटिएको भट्टराईले बताए।

उक्त हतियार दाङको गडवा गाउँपालिका र कपिलवस्तुको शिवनगर नगरपालिकाको सीमामा शुक्रबार बेलुकी फेला पारेको प्रहरीले शनिबार पत्रकार सम्मेलनमार्फत जानकारी दिएको छ।