तीन भारतीयविरुद्ध ११ करोडको राजस्व चुहावट मुद्दा

काठमाडौं- नक्कली बिजक प्रयोग गरी राजस्व छली गरेको अभियोगमा राजस्व अनुसन्धान विभागले तीन भारतीय नागरिकमाथि राजस्व चुहावटमा मुद्दा दायर गरेको छ।

भारतीय नागरिक केशव बंशलसहित तीन जनामाथि मुद्दा दायर गरिएको हो। बंशल काठमाडौं बाफलमा बस्छन्।

विभागले ११ करोड बिगो दाबीसहित काठमाडौं जिल्ला अदालतमा मुद्दा दायर गरेको हो। विभागका अनुसार बंशलसहित हस्पी केयर इन्टरनेसनलका रामसुन्दर रायभर र श्याम ट्रेडर्सका राकेश पाण्डेयलाई पनि विपक्षी बनाएको छ।

बंशलले राजस्व चुहावट गरी आर्जन गरेको रकमबाट खरिद गरेको घर, जग्गा तथा सवारीसाधन नेपाली नागरिकको नाममा दर्ता गरी भोगचलन गर्ने गरेको पाइएको विभागले जनाएको छ।

वस्तु तथा सेवा खरिद नै नगरी नक्कली बिजकमात्र खरिद गरी मूल्य अभिवृद्धि कर र आयकर समेतको राजस्व चुहावट कसुरमा विभागले मुद्दा दायर गरेको हो।

विभागले मूल्य अभिवृद्धि करतर्फ तीन करोड १२ लाख १९ हजार ९ सय ५९ रूपैयाँ र आयकरतर्फ आठ करोड सात लाख ६४ हजार २०५ रूपैयाँ राजस्व चुहावट भएको दाबी गरेको छ। दुवै गरी विभागले ११ करोड १९ लाख ८४ हजार एक ६४ रूपैयाँ बिगो कायम गरेको छ।

आरोपितले राजस्व चुहावट (अनुसन्धान तथा नियन्त्रण) ऐन, २०५२ को दफा ३ ले निषेधित एवं सोही ऐनको दफा ४ को खण्ड (क) र (ख) बमोजिम कसुर गरेको विभागले जनाएको छ।

विभागको दाबी अनुसार ठहर भएका आरोपितलाई बिगोको दोब्बरसम्म जरिवाना तथा तीन वर्षसम्म कैद सजाय हुनेछ। यसबारे थप आवश्यक छानविन तथा अनुसन्धान गर्न सम्पत्ति शुद्धीकरण अनुसन्धान विभागमा लेखी पठाइएको विभागले जनाएको छ।