काठमाडौं- नेपालकाे चार दिवसीय औपचारिक सद्भावना भ्रमणका लागि बंगलादेशका राष्ट्रपति मोहम्मद अब्दुल हमिद काठमाडौं आइपुगेका छन्।
राष्ट्रपति विद्यादेवी भण्डारीले बंगलादेशका समकक्षी हमिदलाई काठमाडौंस्थित त्रिभुवन अन्तर्राष्ट्रिय विमानस्थलमा स्वागत गरिन्।
उनको स्वागतका लागि भण्डारीसँगै विभिन्न राजनीतिक दलका नेता तथा उच्चपदस्थ अधिकारी विमानस्थल पुगेका थिए।
हमिद राष्ट्रपति भण्डारीको निमन्त्रणामा नेपाल आएका हुन्।
नेपाली सेनाले राष्ट्रपति मोहम्मदलाई गार्ड अफ अनर दिएको छ। उनीसँग ५२ सदस्यीय प्रतिनिधिमण्डल छ।
परराष्ट्र मन्त्रालयका अनुसार हमिदले विभिन्न नेतासँग भेटवार्ता गर्नुका साथै विभिन्न स्थानको अवलोकन गर्ने कार्यक्रम तय भएको छ।
हमिद कात्तिक २९ गते स्वदेश फर्कनेछन्।