शाङ्घाई– चिनियाँ उपभोक्ताले सोमबार एकै दिनमा चिनियाँ ई कमर्श समूह अलिबाबाको अनलाइन प्लेट फर्ममा १ अर्ब अमेरिकी डलरको सामान खरिद गरेका छन् ।
अलिबाबाले ६८ सेकेन्डभित्रै १ अर्ब अमेरिकी डलर बराबरको सामान बिक्री गरेको हो। उसले १५ घण्टामा ३३ खर्ब २८ अर्ब डलरको व्यापार गरेको छ ।
अलिबाबाले चीनमा पछिल्ला वर्षहरुमा “वर्षमा एक दिन” (सिङ्गल्स डे) नामको विशेष छुट कार्यक्रम आयोजना गर्न थालेको छ, र यस दिन चिनियाँ नागरिकले सस्तोमा सामान किन्न पाउँछन् ।
अलिबाबाको स्टोरबाट इलेक्ट्रोनिक्सदेखि लत्ताकपडा र घरायासी सामानहरु भारी छुटमा बिक्री भएका थिए ।
अलिबाबाले गत वर्षको तुलनामा यसवर्ष ४३ मिनेट अघि नै अलि–पे मार्फत सम्पूर्ण भुक्तानी प्रक्रिया टुङ्ग्याएको जनाएको छ ।
अलि–पेका अनुसार ६३ मिनेट ५९ सेकेन्डमै १४ अर्ब ३० करोड अमेरिकी डलरको कारोबार गरेर नयाँ रेकर्ड समेत बनेको छ ।
अलिबाबाले यस्तो कार्यक्रमको आयोजना गर्न थालेको ११औं वर्ष पुगेको छ ।
विश्वकै दोस्रो ठूलो अर्थतन्त्र चीनमा उपभोक्ताको मनस्थिति बुझ्न पनि यस कार्यक्रमले सहयोग गरेको छ ।
चीनको अर्थतन्त्र अहिले मन्दीतर्फ अग्रसर रहेको भनिए पनि खुद्रा बिक्रीको अवस्था राम्रो देखिएको छ ।
एक दिने खरिद अर्थात् “११.११” (नोभेम्बर ११) भनिने यस दिनलाई चिनियाँ “अविवाहित” (सिङ्गल्स) को दिन पनि भनिन्छ ।
यस कार्यक्रमका अवसरमा व्यापारिक शहर शाङ्घाईमा विशेष समारोह आयोजना गरिएको थियो ।
मध्यरातबाट शुरु हुने यस खरिदको शुभारम्भ अमेरिकी ग्रामी अवार्ड बिजेता कलाकार टेलर स्वीफ्टले विशेष समारोहबीच गरेकी थिइन् ।
गत वर्ष २४ घण्टे यस कार्यक्रममा अलिबाबा प्लेटफर्मबाट मात्र ३० अर्ब ७० करोड बराबरको सामान बिक्री भएको थियो । तर अघिल्लो वर्षको तुलनामा व्यापारमा सामान्य मन्दी आएको छ ।
अमेरिकामा सूचीकृत अलिबाबाले यसै महिनाको शुरुमा कम्पनीको बिक्री निकै बलियो देखिएको छ, तर कम्पनीको समग्र वृद्धि भने झण्डै ४० प्रतिशतले घटेको छ ।
तर यस वर्षको “सिङ्गल्स डे” कार्यक्रम पहिलोपटक अलिबाबाका सहसंस्थापक ज्याक माको अनुपस्थितिमा सम्पन्न भएको थियो ।
ज्याक माले गत सेप्टेम्बरमा अलिबाबा समूहको नेतृत्वबाट राजिनामा दिएका थिए।
रासस/एएफपी