एएफसी यू-१९ च्याम्पियनसिप छनोट : नेपालले आज कीर्गिस्तानको सामना गर्दै

काठमाडौं- एएफसी यू-१९ च्याम्पियनसिप छनोटमा आज नेपालले कीर्गिस्तानको सामना गर्दैछ। खेल इरानको तेहरानस्थित पिएएस स्टेडियममा नेपाली समयअनुसार साँझ ५ बजे सुरु हुनेछ।

नेपाल छनोट चरणको अन्तिम खेलमा कीर्गिस्तानसँग खेल्न लागेको हो । यसअघि लगातार दुई खेलमा पराजय भोगेको नेपाल कीर्गिस्तानसँग सान्त्वना जित निकाल्ने लक्ष्यमा छ।

यसअघि नेपाल पहिलो खेलमा युएईसँग र दोस्रो खेलमा इरानसँग समान ४-० गोल अन्तरले पराजित भएको थियो।

यसअघिका दुई खेलमध्ये एक मात्रै जितेको कीर्गिस्तान पनि नेपालसँगको खेल जसरी पनि जित्ने रणनीतिमा छ। पहिलो खेलमा इरानसँग ३-० ले पराजित कीर्गिस्तानले दोस्रो खेलमा युएईलाई २-० ले हराएको थियो।

प्रतियोगितामा नेपाल समूह ‘डी’मा छ। यस समूहमा नेपालसहित कीर्गिस्तान, युएइ र इरान छन्।