डडेलधुरा- डा. गोविन्द केसीको अनशनको समर्थनमा शनिबार डडेलधुरा सदरमुकाममा सिटी जुलुस निकालिएको छ।
चिकित्सा क्षेत्र सुधारको माग राख्दै ६ दिनदेखि आमरण अनशनरत केसीको समर्थनमा नागरिक समाज तथा पेशाकर्मी एवं व्यावसायिक संघसस्थाहरूको अगुवाइमा सदरमुकाममा सिटी जुलुस निकालिएको हो । बसपार्कदेखि सुरु भएको जुलुस तुफानडाँडा हुँदै डडेलधुरा अस्पतालबाट तुफानडाँडा चोकसम्म पुगेको थियो।
डा. केसीले राखेका सम्पूर्ण माग पूरा गनुपर्ने, डडेलधुरा अस्पतालमा दरबन्दी अनुसारका डाक्टरको यथाशीघ्र व्यवस्था गनुपर्ने, डडेलधुरामा मेडिकल कलेजका लागि निर्णय गरिनुपर्ने तथा डा. केसीको जीवनको रक्षालगायतका माग गर्दै नागरिक समाजका प्रतिनिधी, पेशाकर्मी तथा व्यवसायी सडकमा उत्रिएका हुन्। जुलुसमा सुदूरपश्चिम प्रदेशका सांसद् तथा नेपाली कांग्रेस डडेलधुराका सभापति कर्णबहादुर मल्लको सहभागी थिए।
गत शुक्रबार डा. केसीको समर्थनमा जिल्ला सदरमुकाममा प्रदर्शन गरिएको थियो। प्रदर्शन क्रममा ‘डा. केसीका माग पूरा गर’ भन्दै नारावाजी गरिएको थियो।
डा. केसीका मागलाई बेवास्ता गरिए सरकारविरुद्ध कडा आन्दोलन गर्ने नागरिक समाज, पेशाकर्मी एवं व्यावसायिक संघसस्थाहरूले चेतावनी दिएका छन्।
डडेलधुरा सदरमुकामा दैनिक प्रदर्शन भइरहेको छ। केसीले सोमबारदेखि सुरु गरेको १७औं चरणको अनशनमा ऐक्यबद्धता जनाउँदै प्रदर्शन भइरहेको हो।
अनशनका क्रममा डा. केसीको स्वास्थ्य अवस्था बिग्रिएपछि शुक्रबारदेखि उनको जिल्ला अस्पतालमा उपचार भइरहेको छ।