काठमाडौं– धनुषाको सुगानिकासमा जन्मेकी रश्मी साह ‘नासा करियर पब्लिक अचिभमेन्ट मेडल’ सम्मानित भएपछि अहिले चर्चामा छन् ।
१० कक्षासम्म काठमाडौंमा अध्ययन गरेकी उनी सन् २००१ मा आमा–बुबासँगै अमेरिका पुगेकी हुन् ।
अमेरिकाको पर्ड्यू विश्वविद्यालयबाट एरोनटिक्स र एस्ट्रोनटिक्समा विद्यावारिधि गरेपछि उनी अहिले अमेरिकी शोध संस्था नासाको जेट प्रोपुलेशन ल्याबरोटरी (जेपीएल) मा कार्यरत छन् ।
करियरको शुरुआती वर्षहरुमै असामान्य र महत्वपूर्ण खोजका लागि योगदान दिने व्यक्तिलाई नासाले ‘नासा करियर पब्लिक अचिभमेन्ट मेडल’ ले सम्मानित गर्छ ।
माटोको आद्रता मापन, हिउँको गहिराई, समुद्री सतहको गुण मापनमा रश्मीको खोज महत्वपूर्ण मानिएको छ ।
आफ्नो करियर सुरु गरेको ६ वर्षमै यो सम्मान प्राप्त गर्ने रश्मी संभवतः नेपाली मूलको पहिलो व्यक्ति हुन्।
वातावरणीय क्षेत्रमा काम गर्दै आएका रश्मीका पिता डा.जयप्रकाश साह पनि अहिले अमेरिकामै अनुसन्धान तथा अध्ययापन गर्छन् ।
नेपालको सरकारी र गैरसरकारी क्षेत्रमा कामको अनुभव लिएका साहले कोसी टप्पू क्षेत्र विषयमा पुस्तकसमेत लेखेका छन्।
नासामा काम थाल्नुअघि रश्मीले गोद्दर स्पेश फ्लाइट सेन्टरमा र स्पेनमा रिर्सचरको रुपमा काम गरेकी थिइन्। सन् २०१३ बाट उनले जेपीएलमा काम थालेकी हुन् ।
प्राकृतिक वातावरणमा रमाउने ३४ वर्षीया रश्मी नेपाल आएका बेला हिमाली क्षेत्रमा घुम्न रुचाउँछिन् ।