प्रदेश प्रमुख परियारलाई उपप्रधानमन्त्री यादवको स्वागत

जनकपुरधाम- प्रदेश २ का नवनियुक्त प्रमुख तिलक परियार बुधबार प्रदेशको अस्थाई राजधानी जनकपुर आइपुगेका छन्।

परियारलाई सत्ता साझेदार समाजवादी पार्टीका अध्यक्ष तथा उपप्रधानमन्त्री एवं स्वास्थ्यमन्त्री उपेन्द्र यादवले स्वागत गरेका थिए। काठमाडौं जाँदै गरेका यादव र काठमाडौंबाट आइपुगेका परियारबीच विमानस्थलको विशिष्ट कक्षमा भेट भएपछि उपप्रधानमन्त्री यादवले प्रदेश प्रमुख परियारलाई स्वागत गर्दै ‘मिथिला नगरीमा स्वागत छ’ भनेका थिए।

परियारलाई स्वागत गर्न मुख्यमन्त्री लालबाबु राउतका साथै नेकपाका कार्यकर्ता विमानस्थल पुगेका थिए। परियारले बुधबार नै प्रदेश प्रमुखको पदभार सम्हालेका छन्।

सरकारले प्रदेश प्रमुख फेरबदल गरेसँगै सत्ता साझेदार समाजवादी पार्टी (सपा) रुष्ट बनेको छ। सपाका संघीय परिषद्का अध्यक्ष डा. बाबुराम भट्टराईले सामाजिक सञ्जाल ट्विटरमार्फत संघीय सरकारको निर्णयप्रति कडा आलोचना गरेका छन्।