सकिएन आलमको बयान, बुधबार पुन: लिइने

काठमाडौं - रौतहटमा आफैँले बनाउन लगाएको बम विस्फोट हुँदा घाइते भएकालाई जिउँदै इँटाभट्टामा हालेर जलाएको अभियोग लागेका निलम्बित सांसद मोहम्मद अफताब आलमको बयान मंगलबार नसकिएपछि पुनः बुधबार लिइने भएको छ। रौतहटका जिल्ला न्यायाधीश दीपक ढकालको इजलासमा मंगलबार आलमको बयान लिइएको थियो।

बयान नसकिएपछि बुधबार बिहान १० बजे बयानका लागि आलमलाई पुन: बोलाइएको अदालतले जनाएको छ। समय अभावका कारण मंगलबार बयान नसकिएकोले बुधबारको लागि बोलाइएको जिल्ला अदालत रौतहटका श्रेस्तेदार गुणराज पराजुलीले जानकारी दिए। उनले भने, 'आलमका पक्षमा बहस गर्ने कानुन व्यवसायीले आलमविरुद्ध तयार पारेको मिसिलको प्रतिलिपि पाउनु पर्ने तथा उनलाई काउन्सिलिङका लागि केही समय दिन माग गरेपछि बयान केहीबेर रोकिएकाले आज समय अभाव भयो।'

आलमविरुद्ध कर्तव्य ज्यान, ज्यान मार्ने उद्योग र बम विस्फोट गरी तीन वटा अभियोग लागेको छ। मान्छेलाई जिउँदै इँटाभट्टामा हालेर जलाएको आरोपमा आलमलाई जन्मकैदको माग दाबी सहित रौतहट जिल्ला अदालतमा सोमबार मुद्दा दर्ता भएको थियो ।

२७ चैत ०६४ मा रौतहट राजपुर फरहदवा-४ सेख इद्रिस खालिहानको गोठमा भएको बम विस्फोटमा घाइते भएका पिन्टु भनिने त्रिलोकप्रताप सिंह, ओसी अख्तरसहितका युवालाई इँटाभट्टामा हालेर जिउँदै जलाइएको थियो।