महरा पुर्पक्षका लागि जेल चलान

काठमाडौं- जिल्ला अदालत काठमाडौंले निवर्तमान सभामुख कृष्णबहादुर महरालाई पुर्पक्षका लागि जेल चलान गर्न आदेश दिएको छ।

जिल्ला न्यायाधीश सुदर्शन राज पाण्डेको एकल इजलासले सोमबार उक्त मुद्दाको थुनछेक बहस गर्दै महरालाई थुनामा राखेर मुद्दाको अनुसन्धान गर्न आदेश दिएको हो। अदालतको आदेशसँगै महरालाई डिल्लीबजार कारागार चलान गरिने भएको छ।

अदालतका श्रेस्तेदार आनन्द श्रेष्ठले महरालाई पुर्पक्षका लागि थुनामै राखेर मुद्दाको अनुसन्धान गर्न आदेश दिएको जानकारी दिए।

तत्काल प्राप्त प्रमाण हेर्दा महरालाई थुनामै राखेर मुद्दाको पुर्पक्ष गर्नुपर्ने देखिएको अदालले निष्कर्ष निकालेको उनले बताए।

महरालाई अस्पताल राख्ने या नराख्ने भन्ने डिल्ली बजार कारागारले नै तय गर्ने श्रेष्ठले बताए। हाल सम्म महरा नर्भिक अस्पतालमा बसिरहरेका छन्।

महराविरुद्ध जिल्ला सरकारी वकिलको कार्यालय काठमाडौंले बिहीवार दायर गरेको मुद्दामा आइतवारदेखि थुनछेक बहस सुरु भएको थियो।

सोमबार काठमाडौंका प्रमुख जिल्ला सरकारी वकिल तथा सहन्यायाधीवक्ता चन्द्रकान्त खनाल, जिल्ला न्यायाधीवक्ता उमाकान्त पौडेल र हरि रेग्मी तथा जिल्ला सह न्यायाधीवक्ता सिर्जना ढकालले पीडितको पक्षबाट बहस गरेका थिए।

महराका पक्षबाट भने वरिष्ठ अधिवक्ता लव मैनाली, पूर्वमहान्यायाधीवक्ता रमण श्रेष्ठलगायतले बहस गरेका थिए।

सम्माननीय सभामुखको गरिमामय पदमा आसिन महराले आफ्नो पदको दुरूपयोग गरी मुलुकी अपराध संहिता २०७४को दफा २१९ को उपदफा १ र २ र सोही संहिताको दफा ३४ बमोजिम जबरजस्ती करणी उद्योगको कसूर प्रमाणित भएको अभियोग पत्रमा उल्लेख छ।

‘मुलुकी अपराध संहिता २०७४ को दफा ३८ को देहाय (घ) बमोजिम कसूरको गम्भीरता बढाउने अवस्थाको भएको’ भन्दै जबरजस्ती करणी उद्योगमा हुने सजायको डेढी सजाय हुने सरकारी वकिलको माग दाबी छ।

१९ वर्षभन्दा माथिकी महिलामाथि जबरजस्ती करणी (बलात्कार) भए कसूरदारले ७ देखि १० वर्षसम्म कैद सजाय पाउँछन्। जबरजस्ती करणी उद्योग (बलात्कार प्रयास)मा भने त्यसको आधा सजाय हुन्छ। अर्थात् साढे तीनदेखि साढे पाँचवर्षसम्मको सजाय हुन्छ।

त्यसमा डेढी कैद सजाय जोडेर झण्डै साढे पाँचदेखि साढे सात वर्षसम्मको कैद सजाय माग गरिएको हो।

महरा असोज १२ गते बा २० च ५७११ नम्बरको सिल्भर कलरको गाडी चढेर रोशनीको कोठामा पुगेको सिसिटिभी फुटेजमा देखिएको र आफूकहाँ आएर महराले जबरजस्ती करणी प्रयास गरेको संसद सचिवालयमा कार्यरत कर्मचारी रोशनी शाहीले जाहेरीमा उल्लेख गरेकी छिन्।

घटना बाहिर आएपछि महराले सभामुखबाट राजीनामा दिएका थिए।