काठमाडौं– नेपाली कांग्रेसका सभापति एवं पूर्वप्रधानमन्त्री शेरबहादुर देउवाले धुलिखेल अस्पतालमा उपचाररत सुकुटे बस दुर्घटनाका घाइतेलाई भेटेर स्वास्थ्य अवस्थाबारे जानकारी लिएका छन्।
सोमबार बिहान धुलिखेल अस्पतालमा पुगेका उनले घाइतेको शीध्र स्वास्थ्य लाभको कामनासमेत गरेका छन्। उनले अस्पतालका चिकित्सकलाई घाइतेको उपचारमा कमी हुन नदिन आग्रह गरे।
उपचारमा आफ्नो पार्टीको तर्फबाट पूर्ण सहयोग रहने उनले बताए। सभापति देउवासँगै पूर्वमन्त्री एवं कांग्रेस नेता मोहनबहादुर बस्नेतलगायत पनि अस्पताल पुगेका थिए।
अस्पतालमा सुकुटे दुर्घटनाका करिब ४० घाइते उपचाररत छन्।
दोलखाबाट काठमाडौं आउँदै गरेको बा२ख ७२४५ नम्बरको बस आइतबार दिउँसो अरनिको राजमार्गको सुकुटेबाट सुनकोशी नदीमा बस खस्दा १७ यात्रुको मृत्यु भएको थियो । दुर्घटनामा परी ५० जना घाइते छन् ।